Əziz Əliyev adına Azərbaycan Dövlət Həkimləri Təkmilləşdirmə İnstitutunun (ADHTİ) Nefrologiya kafedrasının müdiri, Avropa Nefroloqlar Assosasiyasının üzvü, tibb elmləri doktoru, professor Fuad Sərdarlı 30 aprel 1954-cü ildə anadan olmuşdur.
Professor F.Sərdarlı 1970-1976-cı illərdə Azərbaycan Tibb Universitetində ali təhsil almışdır.
1976-1977-ci illərdə Elmi Tədqiqat Cərrahiyyə İnstitutunda internatura keçmişdir.
1977-1983-cü illərdə Goranboy rayonun Mərkəzi Rayon Xəstəxanasının Terapiya şöbəsinin müdiri, baş həkimin müalicə işləri üzrə müavini işləmişdir.
1984-cü ildən bu günədək ADHTİ-də assistent, dosent, kafedra müdiri, professor kimi fəaliyyət göstərməkdədir.
Avropa Nefroloqlar Cəmiyyətinin İdarə heyətinin üzvüdür.
1995-2018-ci illərdə ADHTİ-nin Nefrologiya kafedrasının müdiridir. Prof. F.Sərdarlının rəhbərliyi altında Nefrologiya kafedrasında 7 mütəxəssis nefrologiya üzrə tibb üzrə fəlsəfə doktoru elmi dərəcəsini almışdır.
ADHTİ-nin Nefrologiya kafedrasının bazası olan Mirqasımov adına Respublika Klinik Xəstəxanasında Nefrologiya şöbəsində ağır xəstələrin diaqnostikası, müalicəsi ilə məşğul olur.
Alimin nefrologiya sahəsində 100-ə yaxın elmi əsəri, eyni zamanda metodiki tədris vəsaitləri, məqalələri beynəlxalq və respublika səviyyəli jurnallarda çap olunmuşdur. Nefrologiyaya dair “Xroniki böyrək çatmazlığı” və “Xroniki piyelonefrit” adlı 2 dərsliyin müəllifidir.
2015-ci ildə Azərbaycan Səhiyyə Nazirliyi tərəfindən “Qüsursuz və səmərəli fəaliyyətinə görə” Fəxri Fərmanla təltif edilmişdir.
Prof. F.Sərdarlı 2019-cu ildən etibarən Böyrək Transplantasiyası sahəsində Mütəxəssislər Assosiasiyasının İdarə Heyətinin üzvüdür.